Trump: Izraeli e teproi me sulmin në Bejrut, Netanyahu duhet të jetë më i përgjegjshëm

Kreu i Shtëpisë së Bardhë, Donald Trump, ka kërkuar nga Izraeli një qasje më të matur ndaj Libanit, duke shprehur hapur mospëlqimin për një operacion të kohëve të fundit izraelit në kryeqytetin libanez, Bejrut.

Komentet erdhën gjatë një takimi me Emirin e Katarit, Sheikh Tamim bin Hamad Al Thani, zhvilluar në marzhet e samitit të G7-ës. Në fjalën e tij, presidenti amerikan iu referua zhvillimeve në Lindjen e Mesme dhe veçanërisht përballjes së vazhdueshme mes Izraelit dhe Hezbollahut, e cila sipas tij është shtrirë në kohë dhe ka lënë pas një bilanc të rëndë viktimash.

Kur u pyet nëse ndien zhgënjim ndaj kryeministrit izraelit Benjamin Netanyahu, Trump u përgjigj se lidhja personale mes tyre vijon të jetë e ngrohtë, ndonëse nuk ngurroi t'i bëjë thirrje liderit izraelit për më shumë maturi. "Kam një marrëdhënie të shkëlqyer me të, por ai duhet të jetë më i përgjegjshëm në lidhje me Libanin. Nuk më pëlqeu që ai kreu një sulm… kjo ishte e tepërt", deklaroi ai.

Gjatë daljes së tij, Trump nuk la pa përmendur edhe peshën që ka pasur mbështetja amerikane për shtetin izraelit, duke nënvizuar se Uashingtoni ka luajtur rol kyç në garantimin e sigurisë së aleatit të tij. "Pa Shtetet e Bashkuara nuk do të kishte Izrael, sepse asnjë president tjetër nuk ishte i gatshëm të bënte atë që bëra unë", shtoi ai.

Deklaratat e tij regjistrohen në një periudhë ku tensionet në rajon mbeten të ngritura, ndërkohë që zërat ndërkombëtarë po shtohen për ruajtjen e qetësisë dhe parandalimin e një përshkallëzimi të ri të konfliktit.